ភ្នំពេញ៖ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង ក្រើនរំលឹកពលរដ្ឋកុំឱ្យយកអាល់កុល ឬសាធាតុមេតាណុលមកលាយធ្វើស្រាផឹកបន្ទាប់ពីសង្កេតឃើញថាជារៀងរាល់ឆ្នាំជាពិសេសចាប់ពីខែវិច្ឆិកា ដល់ខែ មករា តែងតែមានករណីពុលស្រាបានកើតឡើងជាបន្តបន្ទាប់នៅតាមសហគមន៍នៃបណ្ដាខេត្តមួយចំនួន។
ក្នុងសេចក្ដីប្រកាសព័ត៌មានចុះថ្ងៃទី១២ ខែវិច្ឆិកា នេះរដ្ឋមន្ត្រីសុខាភិបាល លោក ម៉ម ប៊ុនហេង បានលើកឡើងថា អាល់កុលគឺសម្រាប់យកមកសម្លាប់មេរោគដូចជាសម្រាប់លាងដៃជាដើមមិនអាចយកមកលាយជាមួយទឹក ឬភេសជ្ជនានាមកពិសារបាននោះទេ ខណៈសាធាតុមេតាណុលក៏មានគ្រោះថ្នាក់ដូចគ្នា។
លោកបានបញ្ជាក់ថា៖ «កុំយកអាល់កុលមកលាយជាមួយ ទឹក ឬភេសជ្ជនានា មកពិសារ ពីព្រោះអាល់កុលត្រូវបានធ្វើឡើងសម្រាប់ជា សារធាតុសម្លាប់មេរោគ ដើម្បីបង្ការកុំឱ្យកើតជំងឺឆ្លងនានា ដូចជាអាល់កុលសម្រាប់លាងដៃ ជាដើម។ ចូលរួមកុំពិសាស្រា ដែលបិទឬលាយគ្មានបច្ចេកទេសត្រឹមត្រូវ និងគ្មានការត្រួតពិនិត្យ ។ ចំពោះអ្នកប្រកបអាជីវកម្ម ហាមដាច់ខាត កុំយកសារធាតុមេតាណុលមកលាយធ្វើស្រាស ដែលបង្កឱ្យពុលនិងស្លាប់បាត់បង់ជីវិត»។
លោកបានជំរុញដល់អាជ្ញាធរថ្នាក់ក្រោមជាតិចាត់តាំងកម្លាំងគ្រប់គ្រង ឃ្លាំមើល និងទប់ស្កាត់ការលក់ស្រាបិទ ឬលាយគ្មានបច្ចេកទេសត្រឹមត្រូវ និងណែនាំប្រជាពលរដ្ឋ ជៀសវាងយកសារធាតុ មេតាណុលលាយធ្វើស្រាសដែលបង្កឱ្យពុលនិងស្លាប់បាត់បង់ជីវិតផងដែរ។
ការក្រើនរំលឹករបស់រដ្ឋមន្ត្រីសុខាភិបាលពេលនេះ គឺបន្ទាប់ពីមានពលរដ្ឋ ៧នាក់បានស្លាប់ និង១៤នាក់ផ្សេងទៀតត្រូវបញ្ជូនទៅសង្គ្រោះបន្ទាប់ពីពួកគេបានយកអាល់កុល មកលាយជាមួយទឹក ខ្លះយកមកលាយជាមួយទឹក ក្រូចកូកាកូឡា និងមួយចំនួនទៀតលាយជាមួយទឹកអូអ៊ីឈិកនាំគ្នាពិសារ៕
